O Concello de Allariz xa ten todo listo para a celebración dos Maios 2026, que terá lugar o vindeiro xoves 30 de abril. A xornada encherá a Alameda de música, flores e as tradicionais coplas satíricas nunha fin de semana dedicada a exaltar a natureza e a cultura popular.
Unha mañá de música e tradición
Os actos comezarán ás 11:30h coa chegada dos Maios á Alameda, onde a veciñanza e as persoas visitantes poderán visitalos durante toda a fin de semana. A exposición contará co acompañamento musical do Grupo de Gaitas De Pé Feito e co canto das coplas por parte das persoas participantes ata as 13:30h.
Concursos de Maios e Coplas
A festividade inclúe certames con premios en metálico para as mellores creacións:
• Certame de Maios: A participación está aberta ao público en xeral, de xeito individual ou en grupo. As pezas deben seguir a construción tradicional con materiais como musgo (cosido con agulla e fío), bugallos, xestas e flores. Repartiranse premios de 100 €, 50 € e 40 €.
• Concurso de Coplas: Establécense dúas categorías: unha para a poboación infantil (de 3 a 11 anos) e outra para a mocidade e persoas adultas (de 12 anos en diante). Os grupos, de polo menos 8 persoas, cantarán as súas composicións na Alameda o propio día 30. Os premios oscilan entre os 30 € e os 50 €.
Inscricións e prazos
As persoas que desexen participar deben formalizar a súa inscrición na Casa da Cultura ata o día 27 de abril. No caso das coplas, cómpre entregar unha copia mecanografada no momento de anotarse.
O veredicto do xurado, designado pola Concellería de Cultura, farase público o día 4 de maio a través das canles habituais do concello
