¿Sexo? (10/02/2021)

Paraches a pensar algunha vez nos diferentes sentidos que ten a palabra sexo? Cantos significados distintos podes darlle ao adxectivo sexual? Algunha vez tiveches a sensación de que che faltan palabras para poder explicarte mellor ou que non terminas de entender ben a que se refiren?

Hai un xogo que adoitamos facer quen nos adicamos á educación sexual. Trátase de preguntar,nos grupos cos que traballamos, que palabras se relacionan con este substantivo, con SEXO.

Logo, agrupamos os resultados. O máis frecuente é atopar estes conxuntos:

• Partes/ órganos do corpo.

• Embarazo.

• Pracer.

• Xestos.

• Sentimentos/ emocións.

• Identidades.

Se nos detemos sobre isto, podemos sintetizalos ao redor de catro significados:

➢ Sexo como reprodución, cando se asocia ao proceso do embarazo, ao uso copulativo dos xenitais e á dimorfía corporal.

➢ Sexo como pracer, cando se relaciona cos orgasmos, a capacidade excitativa das diferentes partes do corpo e os xestos que a facilitan.

➢ Sexo como follar, cando agrupa aspectos dos dous puntos anteriores, ao centrarse no uso recreativo e gozoso dos xenitais.

➢ Sexo como aquela calidade do suxeito que lle permite entenderse a si mesmo e aos outros, que se expresa en relación e, unha das consecuencias, é a atracción.

Se un substantivo pode ter significados tan distintos, resulta sorprendente que poidamos entendernos. Ou quizais ocorre que non nos entendemos tanto como cremos.

Que consecuencias está a traernos isto na nosa forma de entendernos a nós e aos demais, nas nosas relacións de parella e na convivencia de veciñas e veciños?

Esperamos que as entradas desta plataforma, as lecturas recomendadas que podes atopar e os podcast que iremos subindo, poidan axudar a entendernos cada vez mellor.