Allariz é un lugar cheo de historia, de tradicións e de vida. Dende hai xa moitos anos, esforzámonos por poñer en valor todo o que somos: os nosos territorios e a riqueza natural, facendo que o noso concello sexa un lugar agradable para vivir, desenvolver proxectos e visitar. Apostamos pola calidade de vida, polo respecto ao medio ambiente e por un modelo de desenvolvemento pensado para as persoas.

Un dos maiores tesouros que temos é o noso patrimonio. Non só o arquitectónico e natural, que coidamos con moito agarimo, senón tamén o patrimonio humano: as persoas que manteñen vivas as nosas tradicións, os oficios, a cultura e a memoria colectiva. Todo iso forma parte da identidade de Allariz e dálle sentido ao que somos hoxe.

A través dos nosos museos, das festas populares, dos espazos culturais e da participación da veciñanza, seguimos transmitindo e celebrando esa riqueza cultural que nos fai únicos.

Seguimos avanzando, tamén a través das novas tecnoloxías, para facer que o Concello estea máis preto da cidadanía. Esta web é unha ferramenta para informar, facilitar xestións e dar a coñecer todo o que acontece en Allariz.

Queremos escoitarvos e contar convosco. Allariz constrúese coa colaboración de todas e todos, día a día, con ilusión e compromiso.