O Festival Internacional de Xardíns de Allariz encheu, de novo, o calendario paisaxístico co seu orixinal formato, único en España. Durante o ano 2015 os visitantes puideron gozar de lugares de contemplación para escoitar a música interior e labirintos que recreaban o camiño cara o canto de sereas, reproducido en pequenos dispositivos ao longo do xardín. Músicas que naceron coa visita aos xardíns, movendo bambú ou pisando grava volcánica e triturado de cunchas de mar. Un director para orquestrar as mil cores das flores e ata un xilófono feito de cañas para facer música “natural”. Todos estes son elementos singulares que os paisaxistas participantes destacaron nas súas instalacións grazas á música que lles inspirou.

Esta foi “unha das edicións máis visitadas e valoradas polo público” Estímase que visitaron o Festival ao redor de 40.000 persoas que deixaron uns ingresos de máis de 31.000 euros.

As cifras mostran o avance do FIXA que se converteu nun referente para o mundo da empresa do paisaxismo.  A asemblea anual de AGAEXAR, a Asociación de Arboricultura, a Asociación Galega de Apicultura ou outras relacionadas co turismo como Garden Tours ou Bomarzo son parte dos exemplos de que o Festival de Xardíns, ademais de ser un dos principais atractivos turísticos da localidade, é un motor económico de referencia para o sector.