Este venres o Concello de Allariz entregará o premio “Vila de Vida” ao alaricano Jose Luis Mascareñas Cid.
O acto terá lugar o día 16 de setembro, ás 19:30h, no salón de actos do Fogar dos Maiores de Allariz.
O premio honorífico ten como obxectivo o recoñecemento e a posta en valor de persoas, asociacións, colectivos, iniciativas, empresas, entidades públicas ou privadas, polos seus traballos de desenvolvemento económico, cultural e social de Allariz.
O galardoado nesta edición de 2022, Jose Luis Mascareñas, doutorouse en 1988 na Universidade de Santiago de Compostela (USC). Tras a súa etapa postdoutoral na Universidade de Stanford, en 1993 pasou a ser Profesor Titular da USC. É catedrático desde 2005, nesta mesma Universidade.
Supervisou case 40 teses doutorais, publicou máis de 210 artigos, escribiu 23 solicitudes de patentes das cales ten rexistradas 6 e outras 3 concedidas. Estes son algúns dos traballos que ten realizado o alaricano. Froito disto, ao longo dos últimos anos recibiu varios premios, en 2017 foi seleccionado membro da Academia Europea de Ciencias (EURASC), e responsable español de EUCHEMS en Química Orgánica. É membro de varios consellos editoriais e fundacións, fundador/primeiro presidente do grupo español de Bioloxía Química da RSEQ e, desde 2021, vicepresidente da RSEQ.
Dende 2014 é director do Centro de Investigación de Química Biolóxica e Materias Moleculares (CIQUS).