Allariz xa está preparado para celebrar as festas patronais de San Bieito que terán lugar  do 12 ao 14 de xullo.

A programación ademais de música galega, actividades deportivas e o tradicional espectáculo pirotécnico inclúe unha nova edición das xornadas gastronómicas, no que será protagonista o viño da DO de Valdeorras e os produtos do mar e da terra do Concello de Carballo.

Os actos, organizados pola concellería de cultura, comezan o xoves día 11 co concerto a cargo da Agrupación Coral Arnoia, na Igrexa de San Bieito e continúan o venres coas xornadas gastronómicas nas que veciños e visitantes poderán degustar os pratos e viños galegos.

A festa prolongarase ata o domingo con actividades familiares, como a Arnoia Radical, e actuacións musicais a cargo de bandas de música, orquestras e grupos musicais. Os xigantes e cabezudos serán portagonistas o día 13 e desfilarán acompañados da agrupación De Pé Feito.

A festa rematará, como é tradición, co espectáculo de pirotecnia, ás 00:30h dende o Campo de Vilanova.