Actuacións de rúa ademais de mercados, actividades para nenos e visitas guiadas ao Rexo centran a Semana Santa ao Vivo en Allariz.
A Semana Santa en Allariz, que agarda unha alta ocupación, desenvolverase de xoves a domingo. Nestes días haberá música ambiental nas rúas do casco histórico, protagonizada polos grupos galegos Canela Cafuné, Sofía Espiñeira, Andrea Bauart, Miguel Alonso, Tino e Benjamín e Beatriz Martínez & Langarika .
O patio do Museo do Coiro acollerá o Mercado de Artesanía no que participan artesáns do coiro, cerámica, pintura, madeira, xoiería ou téxtil, entre outros; o Mercado da Reserva da Biosfera amplía o seu horario o venres e sábado no que os visitantes poderán degustar pratos elaborados en sesións de cociña en vivo e como novidade, o mercadiño do libro vello, no que se exporán e venderán libros e discos de segunda man.
Os nenos e nenas terán unha programación específica, o venres e sábado, coa instalación na Praza Maior , dunha ludoteca con xoguetes populares e tradicionais.
Ademais haberá visitas con degustación no Centro de educación Ambiental o Rexo, visitas guiadas polo Castro de Armea e San Salvador e os museos municipais ampliarán o horario para atender a demanda nestes días.
